"Cabir İmanovun vəfatından bir il ötür. Onsuz bütöv bir il. Bu bir il ərzində elə bir gün olmayıb ki, onunla daxilimdə söhbət etməyim".
Azerimedia.az xəbər verir ki, bu sözləri Əməkdar artist Bəhram Bağırzadə “Parni iz Baku” KVN komandasının üzvü, mərhum aktyor Cabir İmanovun ildönümü ilə bağlı yazarkən qeyd edib:

"Biz həmişə zarafatlaşardıq və bu, o artıq aramızda olmasa da, indi də davam edir. Bəlkə də ona görə ki, mənim üçün o hələ də yaşayır. Haradasa yaxındadır. Sadəcə burada deyil.

Hər gün dualar oxuyuram. Həmin dualarda isə təkcə bir istəyim deyil, həm də bir söhbət var. Əvvəlki kimi... “Polis olmaq istəyirəm” adlı kitab işıq üzü görüb. Bu kitabı Cabir İmanovun əziz xatirəsinə həsr etmişik. Kitab məhz bu tarixə təsadüfən çıxmayıb. Çünki bu, onun arzusu idi və indi kağız üzərində sözlərə çevrilib. Cabir uşaqlıqdan polis olmaq istəyirdi. Xidmətə başlayanda isə bu xəbəri ilk bölüşdüyü insanlardan biri əmim Arif - mənim atam olub. O istəyirdi ki, atam bunu bilsin. Onun qürurunu görmək istəyirdi. Həyatında önəmli yeri olan insanla bu sevinci paylaşmaq istəyirdi.

İndi onların hər ikisi həyatda yoxdur. Mən isə qalmışam bu kitabla, dualarla və artıq heç kimin eşitmədiyi, amma hələ də içimdə səslənən zarafatlarla. Qoy, bu kitab vida deyil, davam olsun. Çünki biz onları xatırladıqca, onlar bizimlədir. Onlarla danışdıqca, bizi eşidirlər. Sevdikcə isə yaşayırlar".

Qeyd edək ki, əməkdar artist Cabir İmanov ötən ilin sentyabrın 29-da 49 yaşında dünyasını dəyişib. Aktyor paytaxtın Səbail rayonunda yerləşən idman zallarından birində olarkən səhhəti qəfil pisləşərək, infarkt keçirib. Hadisə yerinə təcili tibbi yardım briqadası çağırılsa da, onun həyatını xilas etmək mümkün olmayıb.