“Sertifikatlaşdırma prosesi artıq növbəti mərhələsini uğurla başa vurub. Gələn il bütün müəllimlərin sertifikatlaşdırma prosesindən keçməsi təmin ediləcək”.

Bunu elm və təhsil naziri Emin Əmrullayev “Sertifikatlaşdırma 2025: peşəkar müəllim - keyfiyyətli təhsil” mövzusunda ADA Universitetində keçirilən tədbirdə deyib.

O bildirib ki, sertifikasiya prosesi 2022-ci ildən başlayıb: “Ümumilikdə bu günə qədər 7 min 318 müəllim uğursuz nəticə göstərib. Bu prosesin məqsədi müəllimləri işdən çıxarmaq deyil. Biz başa düşürük ki, proses ağırdır, amma 30 suala cavab verməyən müəllimin məktəbdə tədris aparması düzgün deyil. Sertifikatlaşıdırmada verilən suallar xüsusi çətin deyil. Mərhələli şəkildə müəllimlər standartlara cavab verən mütəxəssislər olmalıdır. 7318 müəllim sertifikasiya prosesindən uğurla keçə bilmədiyi üçün əmək müqaviləsinə xitam verilib”.

Nazir bildirib ki, sertifikatlaşdırma nəticəsində yaranan vakant dərs saatlarının bölüşdürülməsi hazırda tədris edən müəllimlər arasında bölüşdürülmə və müəllimlərin işə qəbulu üzrə müsabiqəyə çıxarılma istiqamətdə aparılır: “Bu yanaşma həm mövcud müəllimlərin əlavə dərs yükü ilə stimullaşdırılmasını, həm də yeni namizədlərə imkan yaradılmasını nəzərdə tutur. Bu mexanizm ədalətli bölgü, keyfiyyətli müəllimlərin sistemdə saxlanılması və resursların optimal idarə olunması məqsədi daşıyır”.

O, həmçinin əlavə edib ki, 56 mindən artıq müəllimin əməkhaqqısı artırılıb