Qərb və Gürcüstan arasında münasibətlərin sürətlə pisləşməsi artıq mayın ortalarında "Xarici təsirin şəffaflığı haqqında" Qanuna qarşı müxalifət mitinqində İslandiya, Litva və Estoniyanın xarici işlər nazirlərinin açıq şəkildə iştirak etməsi ilə tam aydın oldu.

Gürcüstanlı siyasi xadim, Azad Gürcüstan Partiyasının lideri Kaxa Kukava belə hesab edir. O, müsahibəsində qeyd edib ki, başqa ölkələrin xarici işlər nazirlərinin Tbilisidə mitinqdə çıxış edərək gürcülərə necə hərəkət etməyi göstərmələri yolverilməzdir:

- Bu hadisə gürcüləri çox narahat etdi. Azərbaycanda, məsələn, belə bir rəzillik heç nəzəri cəhətdən mümkün olmazdı. Hər hansı bir xarici dövlət xadimi bu cür hərəkətlərə görə ölkədən sürətlə və nümayişkaranə şəkildə çıxarılardı. Gürcüstan indi öz suverenliyini bərpa etmək mərhələsindən keçir və Azərbaycan bizim üçün nümunədir. Sizin tam suveren dövlətiniz var, xarici siyasətdə öz maraqlarınız rəhbər tutulur, şərti "əbədi tərəfdaşlar" qarşısında əbədi öhdəliklər götürülmür.

Mən Gürcüstanın indiki hakimiyyətinin tərəfdarı deyiləm, lakin bu konkret məsələdə onların yanaşmasını tamamilə bölüşürəm. Litva, ABŞ və ya hər hansı digər dövlətlərin məmurları bizim daxili işlərimizə qarışmamalıdırlar.

Qeyd etmək lazımdır ki, Gürcüstan və Qərb arasındakı münasibətlər əvvəldən, 1992-ci ildən düzgün qurulmamışdı. O zaman qanuni prezident Zviad Qamsaxurdiya devrildi. Bu, xarici təsir, o cümlədən Qərbin təsiri nəticəsində baş verdi. Bundan sonra Gürcüstan tam müstəqil olmadı və hökumət bunu başa düşürdü: əgər Qərb nəsə məsləhət görürdüsə, bu, tövsiyə deyil, direktiv idi. Bizim Qərbdən asılılığımız əksər postsovet ölkələrindən daha güclü idi.

Hazırda indiki hakimiyyət doğru danışır və hərəkət edir, mən onlara bu işdə uğurlar arzulayıram. Amma onlar sona qədər getməyə nə qədər hazırdırlar? Azərbaycanda güclü dövlət institutları var, dövlət başçısının arxasında güc və xalqın dəstəyi var. Gürcüstan hakimiyyətinə isə hazırda seçicilərin dəstəyi o qədər də yüksək deyil. Rəngli inqilab üçün təhlükəli vəziyyət yaranır.
Xüsusi xidmət orqanlarımızın təhdidlər və təxribatlara, xaricdən planlaşdırılan yarıminqilabi ssenarilərə qarşı mübarizə qabiliyyəti isə ayrı mövzudur.

Amma indi Gürcüstan və Qərb arasında baş verənləri belə xarakterizə etmək olar: Gürcüstan, gecikmə ilə olsa da, yetişdi və başa düşdü ki, guya təmənnasız kömək edən xaricdən "xeyirxah day-daylar" olmur. Deməli, Qərblə əməkdaşlığın yeni formulunu tapmaq lazımdır, çünki əməkdaşlıq quldarlıq demək deyil.

- Amma eyni zamanda, Tbilisinin Avropa kursu qorunub-saxlanılır? Axı Gürcüstanın Avropa İttifaqına üzvlüyə namizəd statusundan məhrum edilə biləcəyi barədə bəyanatlar səslənir.

- Burada hər şey sadədir. Gürcüstanın inteqrasiyası üçün Avropanın təklifi yalnız o halda qüvvədə qalacaq ki, Tbilisidə Avropanı qane edən hökumət olsun. Əgər hakimiyyət oktyabra qədər və ya oktyabrdan sonra (məhz o zaman parlament seçkisi keçirilməlidir - red.) dəyişməsə, Avropa İttifaqı müstəqil Gürcüstanla əməkdaşlığı davam etdirməyəcək. Qərb yalnız ölkəmizdə marioneti hökuməti qəbul edəcək.

- Əlbəttə, Gürcüstan Prezidenti Salome Zurabişvilinin fransalı həmkarı Emmanuel Makrona "ölkəni və ümumiyyətlə Qafqazı sovet və rus boyunduruğundan xilas etməyə kömək etmək" xahişi ilə müraciətini soruşmaya bilmərəm. Bəlkə, məhz buna görə Gürcüstan Baş naziri İrakli Kobaxidze Salome Zurabişvilini vətənə xəyanətdə ittiham edib?

- Bu, orta əsr siyasətidir. İki feodal bir şeyi öz aralarında bölə bilmədikdə digər ölkələrin şahlarını, imperatorlarını, krallarını dəvət edirdi. Salome Zurabişvili müstəqil dövlətin prezidenti kimi qəbul edilmir. O özü də düşünür ki, hansısa müstəmləkənin general-qubernatoru kimidir. Amma bu, yalnız Zurabişvilinin günahı deyil, axı vaxtilə onu Gürcü Arzusu dəstəkləyirdi. Salome Zurabişvili heç vaxt sabit mövqe tutmayıb, özü də təkcə siyasətdə deyil. Mən dəfələrlə demişəm ki, buna görə problemlər olacaq.