"Bir il əvvəl Azərbaycan Milli Məclisi Asiya Parlament Assambleyasının (APA) sədrliyini qəbul edib. APA-nın inkişafı, sıralarımızın genişlənməsi və səmərəliliyin artırılması prioritetlərimizdəndir".

Bunu Bakıda Azərbaycanın sədrliyi ilə keçirilən Asiya Parlament Assambleyasının 15-ci plenar sessiyasında Milli Məclisin sədri Sahibə Qafarova deyib.

O bildirib ki, APA-nın icraedici şurasında iki müraciətə baxılıb:

"Bunlardan biri Omanın assambleyaya tam üzvlüyü, digəri isə Belarus Respublikasının müşahidəçi üzv statusu ilə bağlı vəsatətə baxılmasıdır. İnanıram ki, bu iki müraciətə müsbət cavab veriləcək və bizim sıralarımız daha da genişlənəcək".

"Prezident İlham Əliyevin qeyd etdiyi kimi, dünyanın ehtiyacı olan məsələ beynəlxalq öhdəliklərə əməl edilməsidir. Lakin dövlətlərin daxili işlərinə qarışılması bütün problemlərin qaynağına çevrilib. Azərbaycan da 30 il bu problemdən əziyyət çəkib və ərazilərini yalnız öz gücünə işğaldan azad edib. Azərbaycan həmişə səmərəli və çoxtərəfli sistemin tərəfdarı olub. Ölkəmizin Qoşulmama Hərəkatına 4 illik sədrliyi bunun nümayişidir. Həmçinin Azərbaycanın rəhbərliyi altında COP29-da əldə edilən uğurlar ölkəmizin səmərəliliyə verdiyi töhfənin sübutudur", - deyə spiker əlavə edib.