Azərbaycan iqlim dəyişmələri ilə mübarizədə və dayanıqlı inkişaf məqsədləri istiqamətində öz səylərini ortaya qoyub.
Bu fikri SMACHS Fondunun təsisçisi və baş direktoru, Keniya Respublikası Prezidentinin qızı Charlene Ruto aprelin 28-də Bakıda keçirilən “Həmrəy fəaliyyət: yeni və ədalətli dünya üçün Qlobal Cənub QHT-lərinin gücləndirilməsi” adlı Forumda çıxışı zamanı səsləndirib.

O bildirib ki, Qlobal Cənubun gücünün artırılması mühümdür. Qarşılaşdığımız çağırışlar bizə ciddi təsir göstərir. “Biz bir məqsəd ətrafında birləşməli, tərəqqiyə çatmaq üçün məsuliyyətimizin fərqində olmalıyıq. Birlikdə müqavimətimizi gücləndirməliyik”, – deyə Charlene Ruto vurğulayıb.

O qeyd edib ki, regionda iqlim dəyişmələri problemi mövcuddur və quraqlıq bir çox sahələrə böyük təsir göstərir. “Biz tədbir görməli, səylərimizi birləşdirməliyik. Kifayət qədər cəsarətli olmalıyıq. Ayrı-ayrı yox, birlikdə hərəkət etməliyik. Qlobal cavab tədbirlərini gücləndirməli, gəncləri və icmalarımızı bu prosesə cəlb etməliyik. Planetimizin gələcəyi bizim səylərimizdən asılıdır”, – deyə o əlavə edib.

Charlene Ruto çıxışında Azərbaycanın Qlobal Cənubu daim təşviq etdiyini və Qlobal Şimalla dialoqun inkişafına töhfə verdiyini də vurğulayıb.