"Çin və Azərbaycan iqtisadiyyatları bir-birini tamamlayır və sənaye, investisiya əməkdaşlığı üçün böyük potensiala malikdir. Qarşılıqlı fayda və ümumi qazancla xarakterizə olunan praqmatik əməkdaşlıq hər iki ölkənin xalqlarına fayda gətirir. Son dövrlərdə bu əməkdaşlıq bir neçə xüsusiyyətləri nümayiş etdirib".

Azerimedia.Az xəbər verir ki, bu sözləri Çinin Azərbaycandakı fövqəladə və səlahiyyətli səfiri Lu Mey Prezident İlham Əliyevin Çinə səfərinin nəticələrinə həsr olunan brifinqdə deyib.

"Birincisi, ikitərəfli ticarətin artım tempi təsirli olaraq qalır. Bu ilin iyun ayında Çin və Azərbaycan Respublikasının Ümumdünya Ticarət Təşkilatına (ÜTT) üzvlüyü üçün bazarlara çıxışla bağlı danışıqları əhəmiyyətli dərəcədə yekunlaşdırdılar ki, bu da Azərbaycanın ÜTT-yə daxil olması prosesinə güclü təkan verdi. Azərbaycanın statistikasına görə, bu ilin ilk yeddi ayı ərzində Çinlə Azərbaycan arasındakı ticarət dövriyyəsi 2.45 milyard ABŞ dolları təşkil edib ki, bu da ötən ilin müvafiq dövrü ilə müqayisədə 26% artım deməkdir. İl sonuna qədər ticarət dövriyyəsinin rekord səviyyəyə çatacağı gözlənilir. Çin Azərbaycanın dördüncü ən böyük ticarət tərəfdaşı və idxal üzrə əsas mənbə ölkəsi olub", - deyə səfir əlavə edib.

Onun sözlərinə görə, bu gün Azərbaycan Respublikasının baş nazirinin müavini Şahin Mustafayevin rəhbərlik etdiyi yüksəksəviyyəli nümayəndə heyəti Çin Xalq Respublikasına səfər edəcək:

"Səfər çərçivəsində onlar 25-ci Çin Beynəlxalq Ticarət və İnvestisiya Sərgisində iştirak edəcək, Çin-Azərbaycan İkitərəfli İnvestisiya Forumuna sədrlik edəcək və Çin-Azərbaycan İnvestisiya Əməkdaşlığı üzrə İşçi Qrupunun ilk iclasında iştirak edəcəklər. Bu, iki ölkə arasında ticarət-iqtisadi və investisiya əməkdaşlığına yeni təkan verəcək.

İkincisi, Çin və Azərbaycan arasında "Bir kəmər, bir yol" təşəbbüsü çərçivəsində birgə quruculuq məhsuldar nəticələr verib. Azərbaycan bu təşəbbüsə qoşulan ilk ölkələrdən biri olub".