Azərbaycandan Ukraynaya, demək olar ki, 40 ton avadanlıq daxil olub ki, bu da Ukrayna Dəmir Yollarının işini gücləndirməyə və vacib kritik infrastrukturu dəstəkləməyə kömək edəcək.

Azerimedia.Az xəbər verir ki, bu barədə Ukrayna Energetika Nazirliyinin "X" sosial şəbəkəsində bəyanat yayılıb.



Bəyanatda qeyd olunduğu kimi, Azərbaycandan göndərilən avadanlıq Energetika Nazirliyinin xüsusi habı vasitəsilə çatdırılıb.

Nazirlikdə əlavə ediblər ki, demək olar ki, hər gün habdan Ukraynanın müxtəlif regionlarına avadanlıq göndərilir. Bu, Rusiya hücumlarının daimi təhlükəsi şəraitində həm energetika sektorunun, həm də digər həyati əhəmiyyətli infrastrukturun fəaliyyətini təmin etməyə kömək edir.

"Ukrayna ilə həmrəyliyə və kritik infrastrukturumuza dəstəyə görə Azərbaycana və STP "Global Cable" şirkətinə təşəkkür edirik", - deyə məlumatda bildirilir.

Xatırladaq ki, aprel ayında Prezident Volodimir Zelenski Azərbaycana səfəri zamanı altı ikitərəfli müqavilənin imzalandığını açıqlamışdı.

Həmin səfərdən sonra Azərbaycan tərəfi Ukraynaya humanitar dəstək məqsədilə beş ədəd sərnişin avtobusu da təqdim etmişdi.