Vətəndaşlar texniki pasportla (texpasport) əmlakına dair mülkiyyət hüququ əldə edə biləcəklər.

Bu barədə "Daşınmaz Əmlakın Dövlət Kadastrı və Reyestri" publik hüquqi şəxsinin sədri Nigar Alimova Prezident İlham Əliyev tərəfindən iyulun 16-da imzalanan "Daşınmaz əmlakın dövlət reyestri haqqında" Azərbaycan Respublikasının Qanunu qüvvəyə minənədək əldə edilmiş və yaranmış daşınmaz əmlak obyektləri üzərində hüquqların əldə olunmasını təsdiq edən sənədlərin Siyahısı"nda dəyişikliklər edilməsi barədə" Fərmanının mahiyyəti və üstünlükləri barədə ictimaiyyətin məlumatlandırılması məqsədilə təşkil olunan brifinqdə məlumat verib.

O bildirib ki, yeni islahat nəticəsində vətəndaşlar öz əmlaklarına - fərdi yaşayış evlərinə, torpaq sahələrinə mülkiyyət sənədlərini əldə etmək imkanı qazanıb:

"Ölkədə Prezident İlham Əliyevin rəhbərliyi ilə bütün sahələrdə olduğu kimi, əmlak inzibatçılığı, əmlak hüquqlarının qeydiyyatı sahəsində çox saylı islahatlar həyata keçirilir. Bu islahatların davamı olaraq iyul ayında önəmli fərman layihəsi imzalanıb. Fərman layihəsi 2015-ci ildə imzalanmış 439 nömrəli fərmana düzəlişləri nəzərdə tutur.

Müxtəlif dövrlərdə ayrı-ayrı dövlət və qeyri-dövlət orqanları tərəfindən vətəndaşlara çoxsaylı mülkiyyətə və istifadəyə verilməsi nəzərdə tutulan sənədlər mövcud idi. Lakin bu sənədlərin əsasında əmlak hüquqlarının rəsmiləşdirilməsi mülkiyyət hüquqlarının alınması mümkün deyildi. Bu baxımdan 439 nömrəli fərman özündə çox önəmli sənəd idi.

Fərman nəticəsində yüzminlərlə vətəndaş öz əmlaklarına - fərdi yaşayış evlərinə, torpaq sahələrinə mülkiyyət sənədlərini əldə etmək imkanı qazanıb.

Hər il biz xidmət olaraq vətəndaşların müraciətləri əsasında təhlillər aparırıq. Təhlillər nəticəsində onu da görürdük ki, artıq vətəndaşların əlində 439 nömrəli fərmanla təsbit olunmuş sənədlərdən fərqli sənədlər mövcuddur. Bu dəyişikliyin mahiyyəti həmin siyahını genişləndirərək, yeni hüquq müəyyənedici sənədlər gətirməklə vətəndaşların əllərində olan müxtəlif orqanlar tərəfindən verilmiş sənədlərə hüquq müəyyənedici sənəd statusu verməkdir.

Artıq əvvəlki dövrlərdə, xüsusilə 2001-ci il yanvarın 1-dək texniki inventar idarələri tərəfindən tərtib olunmuş texpasport sənədləri əllərində olan vətəndaşlar bu sənədlərdə torpaq sahələrinin ölçüsü göstərilibsə, həmin sənədlərlə müraciət edərək həm torpaq sahəsi, həm də tikili üzərində hüquqları əldə edə biləcəklər. Burada önəmli məsələ bundan ibarətdir ki, həmin tikilinin qeydiyyatdan keçib-keçməmə şərti aradan götürülüb".

Burada bir məsələni vurğulamaq lazımdır ki, həm 439 nömrəli fərmanın tətbiqi zamanı, həm də yeni fərmanın tətbiqi zamanı vətəndaşların əllərində olan sənədlərin arxiv əsasları mövcud olmalıdır.