Bakı Metropolitenində tələbə kartları ilə təmassız ödəniş sistemi ilkin test rejimində istifadəyə verilib".

Bunu açıqlamasında "Bakı Metropoliteni"QSC-nin mətbuat katibi Bəxtiyar Məmmədov deyib.



Onun sözlərinə görə, proses hazırda ilkin sınaq mərhələsindədir və hələ tam test rejimi kimi də qiymətləndirilmir.

"İndiki halda ümumiyyətlə, o barədə heç nə deyə bilmirik. Sadəcə bir qrup tələbənin kartı ilə yoxlanış aparılıb və həmin vasitə ilə bütün proseslər sınaqdan keçirilir", - deyə B.Məmmədov bildirib.

Metropoliten sözçüsü test mərhələsinin nə qədər davam edəcəyi ilə bağlı dəqiq məlumatın olmadığını da diqqətə çatdırıb.

"Hələ bilinmir, necə olacaq, bu proses nə qədər çəkəcək, yekun nə olacaq - bu gün bu suallarla bağlı heç nə məlum deyil. Hansısa bir nəticəyə gəlinsə, ictimaiyyətə bu barədə məlumat veriləcək", - deyə B.Məmmədov qeyd edib.

Təhsilin İnkişafı Fondunun mətbuat katibi Könül Abdulrəşidova isə açıqlamasında bildirib ki, sözügedən yenilik yalnız tələbələrə aid deyil, bank kartları vasitəsilə təmassız ödəniş sisteminin test mərhələsinin həyata keçirilməsi ilə bağlıdır.



"TələbəPlus" kartı həm də bank kartı statusuna malikdir. Bu səbəbdən hazırda metropolitenlərdə aparılan sınaq mərhələsi çərçivəsində bu kartla da ödəniş etmək mümkündür. Kartların ümumilikdə ictimai nəqliyyat sisteminə inteqrasiyası həm texniki, həm də inzibati baxımdan çoxmərhələli və kompleks bir prosesdir.

Bu istiqamətdə mərhələli yanaşma tətbiq olunur və Fond tərəfindən bütün zəruri addımlar ardıcıl şəkildə həyata keçirilir. Tələbələr üçün xüsusi endirim və güzəştlərin müəyyən edilməsi isə Tarif Şurasının səlahiyyətinə aid məsələdir.

Təhsilin İnkişafı Fondu olaraq ictimaiyyəti bu prosesin gedişi barədə mütəmadi şəkildə məlumatlandıracağıq", - deyə K.Abdulrəşidova bildirib.