Mayın 1-dən 3-dək Bakıda Beynəlxalq Xalça Festivalı keçirildi. Festivalın keçirildiyi əsas məkan İçərişəhər oldu. Proqram çərçivəsində burada mühazirələrdən tutmuş ulduzların konsertinədək müxtəlif tədbirlər keçirildi.

Qoşa Qala meydanında yerli istehsalçıların şəhərimizin sakinlərini və qonaqlarını öz məhsulları ilə tanış etmək üçün xüsusi köşklər qurulmuşdu. Festival dünyanın müxtəlif yerlərindən tanınmış incəsənət və mədəniyyət xadimlərini, tətbiqi sənət ustalarını, xalçaçıları və mütəxəssisləri bir araya gətirdi. İştirakçılar arasında hörmətli qonaqlar da var idi və festivalın özü canlı və zəngin proqramı sayəsində geniş rezonans doğurdu.

Bir çox yerli bloqerlər tədbirdə iştirak edərək şəkillər paylaşdılar: festival möhtəşəm idi və ictimaiyyətin diqqətini cəlb etdi. İçərişəhərdə xalçalar və tematik instalyasiyalar yerləşdirilərək bayram ab-havası yaradıldı.

Lakin festivalın başa çatmasından sonrakı səhər o qədər də rəngarəng deyildi. Oxu.Az-ın müxbiri fərqli bir mənzərənin şahidi oldu: qala divarlarının yaxınlığındakı daş döşənmiş küçələrə plastik stəkanlar, butulkalar, torbalar və digər zibillər səpələnmişdi.

Bunu UNESCO-nun Dünya İrsi Siyahısına daxil olan İçərişəhərdə görmək xüsusilə kədərlidir. Bu tarixi məkan çoxsaylı zibil qutuları olmasına baxmayaraq, insanlar tərəfindən zibilliyə çevrildi.

Oxu.Az hadisə yerindən görüntüləri təqdim edir və vətəndaşları mədəni irsə hörmətlə yanaşmağa, İçərişəhərin hər bir daşına dəyər verməyə, tarixi çirkləndirməməyə və Azərbaycan mədəniyyətinin, xalça sənətinin və adət-ənənələrinin populyarlaşdırılmasına yönəlmiş təşəbbüslərə hörmətlə yanaşmağa çağırır.