Cənubi Çin dənizində hərbi dəniz qüvvələrinin toqquşması səbəbindən rəsmi Pekin Filippinin Çindəki səfirini çağıraraq ona rəsmi etirazını çatdırıb.

Azerimedia.Az xəbər verir ki, bu barədə məlumatı "Reuters" agentliyi yayıb.

Bildirilib ki, bazar ertəsi qeydə alınan insidentdən sonra Çin və Filippin bir-birini günahlandırıb. Filippin hökuməti baş vermiş hadisə zamanı dəniz qüvvələrinin bir hərbçisinin başından travma aldığını bəyan edib. Pekin isə öz növbəsində baş verənlərə görə bütün məsuliyyəti Filippin tərəfinin üzərinə qoyub.

Çərşənbə axşamı Çin Sahil Mühafizə Xidməti bəyan edib ki, humanitar mülahizələrə əsaslanaraq, Filippinə xəsarət almış hərbçini saya oturmuş hərbi gəmidən kiçik qayıqların köməyi ilə təxliyə etməyə icazə verib.

Filippinin Çində fəaliyyət göstərən səfirliyi məsələ ilə bağlı hələlik hər hansı bir açıqlama verməyib.