"Azərbaycan Ermənistan ilə sülh sazişi bağlamağa hazırdır".

Azerimedia.Az "Buenos Aires Times"a istinadla xəbər verir ki, bunu Azərbaycan Prezidenti İlham Əliyevin xüsusi tapşırıqlar üzrə nümayəndəsi Elçin Əmirbəyov Argentinaya səfəri zamanı deyib.

O, Azərbaycanın Argentinadakı səfirliyinin təşkil etdiyi mətbuat konfransında bildirib ki, Cənubi Qafqazın iki xalqı tarixi müqaviləni bağlamağa yaxındır.

E.Əmirbəyov diqqətə çatdırıb ki, davamlı sülhün təsis edilməsindən ötrü Ermənistan tərəfindən konstitusiya islahatı zəruri addımdır:

"Ermənistanın hazırkı konstitusiyası Azərbaycanın suveren ərazisinin bir hissəsinə ərazi iddialarını ehtiva edir. Biz istəyirik ki, bu iddialar Ermənistanın konstitusiyasından çıxarılsın, çünki onları diqqətdən kənarda qoysaq, həll etməsək, gələcək sülhə ciddi təhdid törədə bilər. İndi top Ermənistanın tərəfindədir".

Prezidentin xüsusi nümayəndəsi əlavə edib ki, sülh sazişi ATƏT-in Minsk qrupunun buraxılmasını da tələb edir. Onun sözlərinə görə, Azərbaycan və Ermənistan arasındakı şərti sərhəddə patrul xidməti aparan Avropa silahlı qüvvələri bu ərazini tərk etməlidirlər:

"Biz əminik ki, münasibətlərimizin gələcəyi Ermənistan və Azərbaycanın əlindədir və bu işdə hansısa üçüncü tərəfə, kənar qüvvələrə ehtiyac yoxdur".

E.Əmirbəyov Azərbaycan-Argentina ticarət danışıqlarına da toxunaraq Azərbaycanın bu ölkə ilə xüsusilə kənd təsərrüfatı və ticarət vasitəsilə iqtisadi münasibətlərinin möhkəmləndirilməsinə ümid etdiyini vurğulayıb:

"Fikrimcə, Argentinanın Ermənistan ilə gözəl münasibətləri var, amma bu o demək deyil ki, Argentinanın Azərbaycanla gözəl münasibətləri ola bilməz".